തൃശ്ശൂർ: വടക്കാഞ്ചേരി ലൈഫ് മിഷൻ ഫ്ളാറ്റ് വിവാദത്തിൽ സർക്കാരിന് ലഭിക്കേണ്ട ഒമ്പത് കോടിയോളം രൂപ തട്ടിയെടുക്കാൻ ഗൂഢാലോചന നടത്തിയെന്ന് കാണിച്ച് മുഖ്യമന്ത്രി പിണറായി വിജയൻ, തദ്ദേശമന്ത്രി എ.സി.മൊയ്തീൻ, മുൻ പ്രിൻസിപ്പൽ സെക്രട്ടറി ശിവശങ്കർ, സ്വപ്ന സുരേഷ്, സന്ദീപ് നായർ, യൂണിടാക് ഉടമ സന്തോഷ് ഈപ്പൻ തുടങ്ങിയ 10 പേരെ പ്രതികളാക്കി അനിൽ അക്കര എം.എൽ.എ വടക്കാഞ്ചേരി പൊലീസിൽ പരാതി നൽകി. പ്രതിപക്ഷ നേതാവ് ആവശ്യപ്പെട്ടിട്ടും താൻ രേഖാമൂലം ആവശ്യപ്പെട്ടിട്ടും രേഖകൾ നൽകിയിട്ടില്ല. സ്വന്തം മണ്ഡലത്തിൽ ഒമ്പത് കോടിയുടെ തട്ടിപ്പ് നടത്തിയ സംഭവത്തിൽ ഇടപെടാതിരിക്കാനാവില്ല. 24 മണിക്കൂറിനകം എഫ്.ഐ.ആർ രജിസ്റ്റർ ചെയ്തില്ലെങ്കിൽ ഭരണഘടനാ സ്ഥാപനങ്ങളെ സമീപിക്കുമെന്നും അനിൽ അക്കര എം.എൽ.എ അറിയിച്ചു.
